DC KILOMBERO AWATAKA WANANCHI KUCHUKUA TAHADHARI KIPINDI HIKI CHA MVUA. ABIRIA ZAIDI YA 500 WAKWAMBA BAADA YA NJIA YA RELI YA TAZARA KUFUNIKWA NA KIFUSI

 

Na: Lilian Kasenene, Morogoro 

maipacarusha20@gmail.com

MKUU wa Wilaya Kilombero Dunstan Kyobya amewataka wananchi wilayani humo   kuendelea kuchukua tahadhari  kutokana na mvua inayoendelea kunyesha na kusabababisha mafuriko, kwa kuwasimamia watoto kutokwenda kucheza kwenye madimbwi.

Alisema hayo wakati akikagua na kutoa msaada kwa abiria zaidi ya 500 waliopata changamoto ya kunasa eneo la Lumumwe wilayani humo baada ya mvua zinazoendelea kunyesha kuharibu Miundombinu ya Madaraja na Makaravati  na kusababisha kifusi kufunika Reli ya TAZARA .

"Msiwaache watoto wakaenda kucheza kwenye madimbi ya maji ni hatari wanaweza kuzama na kupoteza maisha" alisema.

Aidha, aliwajulisha abiria sasa treni iliyokuwa inafanya safari zake ndani ya Dar Esa Salam  kwa jina Maarufu Mwakyembe,  imefika Mlimba na itaanza safari ya kuelekea Jijini Dar es Salaam .

Pia aliwaambia  wananchi wa kata ya Kalengakelu kuwa  wakala wa barabara Tanzania (Tanroads ) wataanza kufanya kazi ya kuunganisha barabara katika  maeneo yaliyokatika  katika vijiji hivyo.

Abiria hao waliokuwa wanasafiri kutoka Makambako  kuelekea  Kidatu  wilayani Kilombero,  kwa kutumia usafiri wa treni kushindwa kupita maeneo hayo kutokana na kuangukiwa kifusi katika barabara hiyo.

Kwa mujibu wa mhandisi wa treni hiyo Kelvin Kyara alisema kuanzia sasa safari zitaanzia Mlimba mjini   wilayani humo hadi Dar es Salaam kwa kutumia tren ya mwakyembe na kusitisha safari za Mkambako.

Alisema miundombinu ya tren imeharibika watajitahidi kutengeneza haraka ili watu waendelee kusafiri kama zamani.