TAWA kukata rufaa baada kuachiwa Watuhumiwa walikamatwa baada ya kuuwa Twiga

 

Mwandishi wetu, Babati.

maipacarusha20@gmail.com

Mamlaka ya Usimamizi wa Wanyamapori (TAWA) imewasilisha notisi ya Kukata rufaa kupinga kuachiwa na Mahakama, Wakazi wawili wa kijiji cha Minjingu, wilaya ya Babati mkoa wa Manyara  Masiali Lais Kipara(19) na Paulo Richard(23) waliokamatwa na Twiga mdogo, wakiwa tayari wamemuuawa ili  kuuza nyama.

Watuhumiwa hao, walikamatwa Februari 14,2023 katika eneo la Jumuiya ya hifadhi ya wanyamapori ya Burunge, (Burunge WMA) na Askari wa wanyamapori, askari wa  Burunge  na Askari wa Taasisi ya chem chem ambayo imewekeza katika eneo hilo wakiwa na  Twiga aliyeuawa mwenye kilo 54.5 mwenye thamani ya sh 35.1 milioni.

Hata hivyo, mwishoni mwa wiki baada ya kusikilizwa kesi hiyo kwa takriban miezi mitano  mbele Hakimu mkazi wa mahakama ya mkoa wa  Manyara, Martin Masao  aliwaachiwa huru .

Miongoni mwa sababu za kuachiwa huru Watuhumiwa hao alieleza ni kutofautiana kwa ushahidi wa shahidi muhimu katika shitaka hilo,Afisa Wanyamapori wilaya ya Babati Samweli Bayo ambaye alishiriki katika ukamataji wa Watuhumiwa hao.

Hata hivyo ,akizungumza na mwandishi wa habari hizo ,Mwendesha mashitaka wa TAWA, Getrude Kariongi amesema tayari wamewasilisha notisi ya Kukata rufaa.

"Tumepata hiyo Hukumu tunapitia mwenendo wote wa kesi na baadae tutakata rufaa na tuwatoa notisi"amesema 

Amesema mapungufu ya kisheria ambayo yamesababisha kuachiwa Watuhumiwa hao wanayafanyia kazi .

Kuachiwa huru Watuhumiwa hao na Mahakamani sasa imekuwa ni awamu ya pili awali waliachiwa na Mahakama kwa madai wana umri chini ya miaka 18 hata hivyo baadae wakakamatwa tena na Polisi na askari wa TAWA na  kesi kuanza kusikilizwa.