HATMA YA MGOGORO WA UMILIKI WA MGODI MERERANI KUJULIKANA LEO BAADA YA KUPIMWA UPYA

Madini ya Tanzanite yanayopatika NCHINI TANZANIA tu KATIKA eneo la Mererani MKOANI MANYARA 

Mmiliki WA MGODI WA uchimbaji madini ndugu Miroshi akionesha eneo la MGODI wake aliodhulumiwa

Na Mwandishi wetu Mererani.

maipacarusha20@gmail.com

Mgogoro wa umiliki wa mgodi wa madini ya Tanzanite uliokuwa unamilikiwa na Mchimbaji mdogo  Patrick Miroshi na baadae kuuziwa mfanyabiashara maarufu jijini Arusha, Japhet Lema umetinga taasisi ya kuzuia na kupambana na rushwa(TAKUKURU) na leo  mgodi huo utapimwa upya kujua nani ni mmiliki halali.

Hatua hii, imekuja takriban wiki moja tangu, Miroshi kumuomba Rais Samia Suluhu kumsaidia kurejeshewa mgodi wake wenye leseni namba PML 000943NZ, ambao amekuwa akiuchimba tangu mwaka 2012 na mfanyabiashara huyo alikuwa akimfadhili.

Akizungumza na vyombo vya Habari jana  Miroshi alisema  anamshukuru Rais Samia Suluhu kutuma maafisa wake kushughulikia suala lake na LEMA.

"Baada ya maombi yangu kwa Rais, Maafisa wa TAKUKURU wameniita  na nimewapa maelezo yangu yote na nyaraka zote na wameahidi kulifanyia kazi suala langu"alisema

Mchimbaji mdogo  WA Madini mererani ndugu Patrick Miroshi akiwa KATIKA eneo la uchimbaji madini hayo ya Tanzanite 

Alisema pia anashukuru machi 17 mwaka huu, , aliitwa na maafisa wa madini Mererani, ambapo walikwenda kupima upya mgodi na ilithibitika mgodi ambao amemilikishwa mfanyabiashara huyo ni mali yake.

"Tulikwenda na maafisa madini, wakiongozwa na Afisa madini mkazi Mererani, Menard Msengi na mpimaji migodi Elias Azaria na mashahidi wa pande zote  na baada ya kupima mgodi ilithibitika mgodi  upo ndani ya leseni yangu"alisema

Afisa madini Mkazi wa Mererani, Msengi alikiri ofisi yake kuanza kushughulikia mgodi huo na walipima mgodi katika hatua za awali  hata hivyo mfanyabiashara Lema alipinga matokeo ya vipimo hivyo.

Msengi alisema leo watakwenda tena kupima tena mgodi huo, kwa kutumia wapimaji kutoka Wizarani ili kuona haki ipo wapi kwani inaonekana mgodi kuwa kati kati ya leseni mbili.

"Kesho(leo) tutapima kujua eneo kubwa la mgodi lipo wapi na baada ya hapo tutakuwa katika mazingira mazuri ya kuzungumza"alisema

Kabla ya mgogoro huu, Miroshi alikuwa amesaini mkataba na mfanyabiashara huyo Lema ambaye ni maarufu kwa jina la Njake, Julai 5, mwaka 2018  kumfadhili kushirikiana kuchimba madini katika mgodi huo,

Hata hivyo, alisema mfadhili huyo, baada ya kuchimba kwa miaka miwili, alianza kushinikiza kuwa mmiliki mwenza jambo ambalo alikataa na mgogoro kufikishwa chama cha wachimbaji madini mkoa Manyara na baadaye wizara ya madini bila ya kupata suluhu.

Hata hivyo, alisema, alishangazwa Februari 13, mwaka huu, maafisa wa madini kutoka wizara ya madini, kufika katika mgodi wake na kumweleza kuwa amekuwa akichimba kwa miaka 11 eneo ambalo sio lake na wakamuonesha eneo la pembeni na mgodi wake kuwa ndilo lake

Mfanyabiashara Lema, alikiri kuwa alikuwa na mkataba wa miaka 10 kuchimba madini katika mgodi huo wa Miroshi na kueleza ameuziwa mgodi huo na Angoshi Selemani na Omari Masanyika wenye namba PML 00416 SMN.