WANANCHI MONDULI WATAKIWA KUWAFICHUA WATOA HUDUMA WANAOVUNJA SHERIA

Mchumi, Idara ya Uendelezaji Sekta ya Fedha, Wizara ya Fedha, Bw. Godfrey Mwatwinza, akitoa elimu ya fedha mkoani Arusha ikiwa ni awamu ya tatu ya utoaji elimu ya fedha kwa umma ambapo mpaka sasa mikoa kumi na mbili imeshafikiwa ikiwemo mikoa ya Lindi, Morogoro, Manyara, Simiyu, Shinyanga, Tabora, Rukwa, na sasa ni mkoa wa kumi na tatu ambao ni Mkoa wa Arusha, huku awamu hii ikihusisha mkoa wa Mara na Mwanza ambayo itafikiwa hivi karibuni.



Afisa Mwandamizi, Uchambuzi Fedha, Idara ya Sera, Utafiti na Mipango, kutoka Mamlaka ya Masoko ya Mitaji na Dhamana (CMSA), CPA. Gladness Mollel, akitoa elimu kwa wafanyabiashara na wajasiriamali wa Wilaya ya Monduli mkoani Arusha kuhusu masuala ya uwekezaji alipoambatana na Maafisa kutoka Wizara ya Fedha, kwa ajili ya kutoa elimu ya fedha, programu ambayo imeandaliwa na Wizara ya Fedha ikiwa ni awamu ya tatu ya programu hiyo yenye lengo la kuwaelimisha wananchi wote juu ya masuala ya fedha.

Picha na Kitengo cha Mawasiliano Serikalini, WF- Arusha

Afisa Usimamizi wa Fedha, Idara ya Uendelezaji Sekta ya Fedha, Wizara ya Fedha, Bw. Salim Khalfan Kimaro, akitoa ufafanuzi kuhusu Filamu ya elimu ya fedha yeye maudhui mbalimbali ikiwemo, usimamizi wa fedha binafsi, utunzaji wa akiba, matumizi sahihi ya fedha, masuala ya uwekezaji, wakati akitoa elimu ya fedha wilayani Monduli mkoani Arusha.

Kaimu Mkurugenzi wa Halmashauri ya Wilaya ya Monduli mkoani Arusha, Dkt. George Kasibante (aliyeketi), akiwa katika picha ya pamoja na Timu ya Wataalam wa kutoa elimu ya fedha kutoka Wizara ya Fedha ikiongozwa na Afisa Usimamizi wa Fedha, Idara ya Uendelezaji Sekta ya Fedha, Wizara ya Fedha, Bw. Salim Khalfan Kimaro (wakwanza kulia), Mchumi kutoka Idara ya Uendelezaji Sekta ya Fedha, Wizara ya Fedha, Bw. Godfrey Mwatwinza (wapili kulia), Afisa Mwandamizi, Uchambuzi Fedha, Idara ya Sera, Utafiti na Mipango, kutoka Mamlaka ya Masoko ya Mitaji na Dhamana (CMSA), CPA. Gladness Mollel (wapili kushoto) pamoja na Afisa Maendeleo ya Jamii Wilaya ya Monduli Bi. Fauziya Omari baada ya Timu hiyo kufika ofisini kwake kabla ya Kwenda kutoa elimu ya fedha kwa wananchi wa Wilaya hiyo.

Wajasiliamali, Wananchi na Wanafunzi wa Chuo cha Ualimu Monduli mkoani Arusha wakifuatilia filamu ya elimu ya fedha yenye maudhui mbalimbali ikiwemo, usimamizi wa fedha binafsi, utunzaji wa akiba, matumizi sahihi ya fedha, masuala ya uwekezaji walipotembelewa na Timu ya Wataalam wa kutoa elimu ya fedha kutoka Wizara ya Fedha na taasisi zake kwa ajili ya kuwapa elimu ya fedha katika chuo hicho

Na Asia Singano, WF- Arusha




maipacarusha20@gmail.com




Wajasiliamali na wananchi wa Wilaya ya Monduli mkoani Arusha, wametakiwa kutoa taarifa kwa Maafisa Maendeleo ya Jamii wa Kata zao kuhusu wakopeshaji wasio rasmi wanaokopesha kinyume na taratibu na Sheria za Huduma Ndogo za Fedha ili hatua za kisheria zichukuliwe dhidi yao.




Wito huo umetolewa na Kaimu Mkurugenzi wa Halmashauri ya Wilaya ya Monduli mkoani Arusha, Dkt. George Kasibante, alipotembelewa na kufanya mazungumzo na Timu ya Wataalam wa Kutoa Elimu ya Fedha, kutoka Wizara ya Fedha na Taasisi zake kabla ya Timu hiyo kuelekea katika maeneo mbalimbali ya Wilaya hiyo kutoa elimu ya fedha kwa wananchi.




Alisema utoaji taarifa juu ya uwepo wa watoa huduma za fedha wasiokuwa waaminifu utasaidia Serikali kuwatambua na kuwachukulia hatua za kisheria na kuwafanya watoa huduma hao kufuata Sheria za Huduma Ndogo za Fedha ikiwemo kusajiliwa rasmi na kuleta unafuu wa kukopa kwa wananchi na kukuza kipato chao.




‘’Naamini hawa watu tunaishi nao majumbani, wengine ni wakopeshaji ambao wengine hawatambuliki kwa hiyo wito wangu kwa wananchi kama wakibaini kuna watu wa namna hiyo basi watoe taarifa kwenye Ofisi za Kata zao’’ alisema Dkt. Kasibante.




Aliipongeza Wizara ya Fedha kwa kuendelea kutoa elimu ya fedha kwa umma kwakuwa mafunzo hayo yanawafanya wananchi kupata uelewa juu ya matumizi sahihi ya fedha, masuala ya mikopo na kuwakwamua kiuchumi huku akishauri zoezi hilo kuwa endelevu.




Akitoa elimu ya fedha kwa wananchi wa Monduli, Afisa Usimamizi wa Fedha, Idara ya Uendelezaji Sekta ya Fedha, Wizara ya Fedha, Bw. Salim Khalfan Kimaro, amewasisitiza wahamasishaji wa vikundi vya huduma ndogo za fedha kujisajili na kushiriki mafunzo mbalimbali yanayotolewa ili kuwa wabobezi kuhusu masuala ya fedha huku akiwaasa wajasiliamali kuhakiki usajili wa wahamasishaji wa vikundi vyao.




‘’ Waulizeni wale wahamasishaji mnaowaita walimu wa vikundi mwenzetu umesajiliwa tunaomba tuone cheti chako, kwa sababu mkiwa na wahamasishaji ambao hawana elimu ya uhamasishaji wa masuala ya fedha ataelekeza kinyume na taratibu’’ Alisema Bw. Kimaro.

Alisema Serikali kupitia Wizara ya Fedha inaendelea kutekeleza programu ya kutoa elimu ya fedha kwa umma ili kuhakikisha wananchi wote wanapata uelewa juu ya matumizi sahihi ya fedha.




‘’Hii ni Awamu ya Tatu ya Programu ya Elimu ya Fedha, tayari tulishatembelea na kutoa elimu ya fedha katika mikoa kumi na mbili, huu mkoa wa Arusha ni wa kumi na tatu.




Kwa upande wao baadhi ya wajasiliamali waliohudhuria mafunzo hayo ya elimu ya fedha walisema mafunzo hayo yatawasaidia katika shughuli zao za ujasiliamali huku wakiomba mafunzo hayo yawe endelevu.

Mwisho.